Coma totas las Calandretas, la nòstra escòla es una associacion fondada sus la lei de 1901.

Cada parent de calandron es sòci de fach de l'associacion e la participacion de cadun es indispensabla per la vida de l'escòla. L'associacion es l'estructura que gerís l'escòla, e respond del bon foncionar e del respècte del projècte educatiu de l'escòla.

Lo conselh d'administracion (CA) e l'amassada generala (AG)

Lo CA es elegit del temps de l'amassada generala annadièra de l'associacion. Aqueste compren un quinzenat de sòcis e s'acampa un còp lo mes, es dobèrt a totes los sòcis de l'associacion. Elegís un burèu (president, secretari, clavaire). Lo director de l'escòla i participa de drech. L'amassada generala vota las decisions de las bèlas pel foncionar de l'escòla.

Las còlas

Son creadas en ligam amb lo CA a cada dintrada. Se ne comptan un dezenat. Cobrisson totes los domanis que los parents i se devon investir per far viure l'escòla.

Còla participacion per metre en plaça las accions destinadas a acampar moneda, còla bricolatge per las obretas necessàrias, còla bibliotèca, còla comunicacion, còla fèstas per l'organisar del Carnaval, de la fèsta de fin d'annada...

Lectura e Òc

Aquesta associacion a per tòca la promocion de la lectura en lenga occitana. Porgís a las calandretas una bibliotecària que gerís lo fons de libres occitans a destinacion dels calandrons. Forma tanben lo personal de las bibliotècas de Montpelhièr a la gestion dels fons en lenga occitana.