La Calandreta dau Clapàs de Montpelhièr es eissida d'una associacion creadas en 1981, recampant occitanistes e simpatissaires que militan per la preservacion de la lenga nòstra.

Per la prima de 1982, decidisson de dobrir una escòla mairala, carrièra dau pont Juvenal a Montpelhièr, dins de locals prestats per l'Institut d'Estudis Occitanas (IEO). Es la tresena Calandreta creadas en França, aprèp la de Pau nascuda en 1979, e la de Besièrs. Per començar l'escòla acuèlh pas que tres enfants, puèi uèch enfants l'annada seguenta.

La situacion de l'escòla es alara malaisida e malsegura. Los regents participan a totas las tacas, de l'aculh dels enfants a la preparacion del repaisses de la cantina, e amai lo recapte de l'escòla.Las convencions amb l'Educacion Nacionala son pas tan nautas coma las esperanças dels fondators.

La subrevida e lo desvelopament de l'escòla dependon mai que mai de las subvencions balhadas pels elegits locals. Pr'aquò l'escòla contunha de créisser e aculhís de mai en mai d'enfants e de parents plan afogats de pedagogia alternativa, la lenga e la cultura regionala e lo bilingüisme practicat.

En 1986 la Calandreta dau Clapàs dubrís una classa de primaria quand s'installa dins lo barri de Figairòla, que s'i trapa encara uèi.Una convencion signada entre la Calandreta dau Clapàs e la comuna de Montpelhièr li porgís de locals mai bèls e la mesa a depsosicion de personals.

En 1990, un acòrdi amb lo ministre de l'Educacion Nacionala, Lionel Jospin, ven sostar financiarament las calandretas, mas reconeis pas lor espandiment que cotunha ça que la.

En 1994, un pas dels grands es fach amb l'ajuda d'un autre ministre, François Bayrou : las calandretas signan un contracte d'associacion amb l'Estat, que prevei la titularizacion dels ensenhaires e la reconeissença del desvelopament de las escòlas bilingüas.

Uèi La Calandreta dau Clapàs de Montpelhièr aculhís a quicòm pròche 160 calandrons, de la mairala cap al CM2.